जानेवारी २००७ च्या शेवटच्या आठवड्यात अवघ्या सहा दिवसांत ही कादंबरी लिहून पूर्ण झाली. माझी पहिली कादंबरी 'झिरप' २०१० मध्ये आली ! श्रीकांत उमरीकर, जनशक्ती वाचक चळवळ, औरंगाबाद यांनी प्रकाशित केली होती. प्राचार्य रा.रं. बोराडे सरांनी मूळचे हस्तलिखित वाचून कादंबरीतील वेगळेपणाबद्दल मन भरून प्रशंसा केली. आदरणीय प्राचार्य बोराडे सर माझ्या प्रत्येक मूळ हस्तलिखिताचे पहिले वाचक राहिले असून, तेच माझ्या लेखनाचा मुख्य प्रेरणास्त्रोत आहेत. पुढे पुणे-मुंबईच्या प्रत्येकी दोन प्रकाशकाच्या नादी लागून याही कादंबरीची इतर दोन कादंबऱ्यासारखी फार ससेहोलपट झाली. वैयक्तिक आयुष्यही, अगदी आईचे पहिले दुध पित असतानाच्या वयात त्यात पाणी घालुन ते बाजारात विकता येईल का? असा विचार करणाऱ्या एका व्यावहारिक पातळीवरच्या जंतूसंसर्गामुळे पुर्णपणे छिन्नविछिन्न झाले होते. ह्या अवघड काळात श्री. मकरंद वसंत देवळे (वरिष्ठ रसायन अभियंता, ओमान मस्कत) श्री. प्रविण सुधाकर ढोके (सहाय्यक उपाध्यक्ष स्विस बँक, स्विझरलँड) श्री. चंद्रकांत सूर्यवंशी (निवासी उपजिल्हाधिकारी), श्री. संजय पवार, तहसिलदार, गेवराई या जिवलग मित्रांनी प्रचंड मानसिक आधार दिला. सप्तर्षी प्रकाशन परिवाराने, माझ्या लेखनीला उर्जितावस्था प्राप्त करून दिली त्यामुळे मला आज उभारी घेता आली !

संतोष विठ्ठल घसिंग