रंगभूमी म्हटलं की त्यावर वेगवेगळ्या विषयांवरचे अनेक प्रयोग पहायला मिळतात. त्यात जयेश मेस्त्रींसारखा सामाजिक भान असणारा लेखक असेल आणि त्याच्या लेखणीमधून समाजिक चित्र चितारलं गेलं असेल, तर ते नक्कीच विशेष आहे. 'एल्गार' ही अशीच एक नाट्यकृती, मोजक्या ५ पात्रांमध्ये फुलवलेली. नाटकाच्या पहिल्या प्रवेशापासून, कुठेही रेंगाळत न राहता लेखकाने थेट विषयाला हात घातलाय.

नाटकाचा नायक अभिराम आजच्या शिक्षित तरूण पिढीचं प्रतिनिधित्व करतो. नाटकात येणारी प्रत्येक भूमिका वेगवेगळे विचार समोर घेऊन येते, आणि अनेक मुद्यांवर उहापोह होताना दिसतो. प्राणपणाने ध्येयपूर्ती करण्याचा विचार हे नाटक देतं आणि म्हणूनच 'एल्गार' हे शीर्षक नाटकासाठी योग्य ठरतं...

हे नाटक वाचताना आपण त्यात गुंतत जातो, आणि सगळी कॅरेक्टर्स आपल्यासमोर जिवंत होतात. तसं पाहता हे नाटक सर्वांना माहीत असलेली एक गोष्ट जरी घेऊन येत असलं तरीही आजच्या पिढीला एक संदेश देतं, की ठरलेल्या ध्येयासाठी लढत राहीलं पाहिजे, निष्ठा ही माणसापर्यंत न राहता उत्तम समाज घडवण्यासाठी ठेवली पाहिजे आणि त्यासाठी डोळे उघडे असणं गरजेचं आहे आणि चौकस असणं गरजेचं आहे.

जयेश मेस्त्री यांचं हे पुस्तकरुपी नाटक इतकं दमदार असल्यामुळे आता त्यांच्या पुढच्या लिखाणाची उत्सुकता आणि अपेक्षाही वाढली आहे. त्यांना त्यांच्या पुढच्या वाटचालीसाठी मनःपूर्वक शुभेच्छा.

सचिन सुरेश

अभिनेते, निवेदक, व्हॉईस आर्टिस्ट