श्री. नानासाहेब आवताडे यांनी दामाजी पंताच्या विषयी जी नवीन माहिती मिळाली त्याचा समावेश करुन हे पुस्तक प्रकाशित केले आहे. काही नवीन माहिती त्यांच्या हाती लागल्याचे या पुस्तकातून ते दावा करतात. या नवीन माहितीचे आपण जरुर स्वागत करु. परंतु इतिहास लेखनासाठी भरभक्कम पुराव्याची इतिहासाच्या कसोटीवर घासून फुसूनच आधारभूत मानावी लागते. या संदर्भात श्री. नानासाहेब आवताडे यांनी किती प्रयत्न केले आहेत याचा अंदाज आज तरी मला नाही. परंतु त्याकाळात मुसलमानांची राजवट असताना बीदरच्या बादशहाचे प्रतिनिधी म्हणून मंगळवेढे येथे येवून राज्यकारभार करणारे श्री. दामाजीपंत हे मुळचे कर्नाटकाचे की महाराष्ट्राचे याची शहानिशा व्हायला हवी ते जर मुळचे कर्नाटकाचे असतील तर त्यांना मराठी भाषा चांगली अवगत नसावी असे वाटते म्हणून की काय मराठी भाषेतील त्यांची अभंग रचना नाही.

ते महाराष्ट्राचे असतील तर ते कोठे जन्मले, त्यांच्या आई वडिलांचे नाव काय ? त्यांच्या इतर सगे सोयऱ्यांचे परिचय, जात इ. अंदाज आपणास येत नाही. त्यांच्या साहित्य लेखनाविषयी देखील फारसे काही माहित नाही. तेंव्हा या सर्व पैलूंना स्पर्श करुन इतिहासाच्या कसोटीच्या आधारावर पुराव्यानिशी सखोल चिंतन व मनन करुन दामाजीचे चरित्र लेखन होण्याची जरुरी वाटते. तेंव्हा ते व्हावे अशी अपेक्षा आहे. 

...प्राचार्य डॉ.आ.गो.पुजारी